ᐊᕙᓪᓗᓖᒃ

Deborah Qaunaq: ᐊᓱᐃᓛᒃ, ᐅᕙᖓᑯᓘᒐᒪ ᐅᐃᕐᖑᑦ ᖃᐅᓐᓇᖅ ᑎᐴᓚ, ᑎᐴᓚ ᖃᐅᓐᓇᖅ

ᐅᕙᖓᑯᓘᒐᒪ. ᐅᓇ ᐅᖃᐅᓯᕆᔪᒪᒐᒃᑯ. ᑖᓐᓇ ᐃᓱᒪᒋᔭᐅᖃᑦᑕᖅᓯᒪᖕᒪᑦ

ᖃᓄᐃᑦᑑᖕᒪᖔᑦ [ᑎᐴᕋ ᑎᒃᑯᐊᖅᓯᔪᖅ ᑲᒥᐅᑉ ᓴᓂᕋᖕᒐᓃᑦᑐᒥ]. ᖃᓄᐃᒻᒪᑦ ᑕᐃᒪᐃᑦᑐᖃᖅᐸ? ᐊᐅᓪᓛᖃᑦᑕᖅᖢᓂ

ᐅᑭᐅᒃᑯᑦ ᑖᓐᓇ ᐊᑐᒐᐅᕙᓚᐅᕐᒥᖕᒪᑦ ᐅᑭᐅᒃᑯᑦ ᐊᐅᓪᓛᖃᑦᑕᖅᖢᓂ.

ᐊᒪᖃᖅᖢᓂ ᓄᑕᕋᑯᓗᖕᒥᒃ ᖁᒥᒃᖢᓂ ᐳᐊᓘᖕᓂᒃ ᐃᓂᒋᔭᐅᕙᓚᐅᖅᑐᖅ.

ᑭᓱᑐᐃᓐᓇᕐᒥᒃ ᔭᒐᑦᑕᕆᐊᖃᖏᑦᑐᒥᒡᓗ ᐊᐅᓪᓛᖃᑦᑕᕐᓂᐊᖅᖢᑎᒃ

ᕿᒧᒃᓯᒃᑯᑦ ᑖᓐᓇ ᐴᕆᔭᐅᕙᓚᐅᕐᒪᑦ. ᐊᕙᓪᓗᖅ, ᐊᕙᓪᓗᕐᒥᒃ ᑕᐃᔭᐅᓪᓗᓂ.

ᐅᓇ ᑕᐃᔅᓱᒪᓂ ᐊᑑᑎᓕᐊᓘᓚᐅᖅᓯᒪᔪᕕᓂᐅᖕᒪᑦ, ᓇᓗᔪᑎᒍᓪᓕ

ᑭᓲᖕᒪᒃᑭᐊᖅ ᐅᓇ ᑕᐃᒪᐃᕌᓗᒃᐸ? ᑭᓱᐊᓗᑭᐊᖅ ᐅᓇ?

ᐅᓇ ᐃᒃᐱᐊᕐᔪᒃ. ᐳᐊᓗᒃᑯᕕᒃ. ᓄᑕᕋᑯᓗᖕᒥᒃ ᖁᒥᖕᓂᐊᖅᖢᓂ

ᐊᐅᓪᓛᒥ ᐅᑭᐅᒃᑯᑦ ᐳᐊᓗᒃᑯᕕᐅᕙᓚᐅᖅᑐᖅ ᐊᒻᒪ ᔭᒐᔾᔮᖏᑦᑐᓂᒃ

ᐃᒃᑭᑎᕈᔪᖕᒥᓪᓘᓐᓃᑦ ᓱᕈᕆᐊᖃᖏᑦᑐᓂᒃ ᐊᐅᓪᓛᖃᑦᑕᒥ ᐴᕆᔭᐅᕙᓚᐅᖅᑐᖅ.

ᐊᕙᓪᓗᖅ, ᐊᕙᓪᓗᕐᒥᒃ ᑕᐃᔭᐅᓪᓗᓂ. ᑕᐃᔅᓱᒪᓂ ᑕᐃᒃᑯᐊ ᓯᕗᓕᐊᓗᒃᐳᑦ

ᓯᕗᓪᓕᒻᒪᕆᒃᐳᑦ ᑕᐃᒪᐃᑦᑐᒥᒃ ᐱᖃᓗᐊᖅᐸᖕᓂᕐᒪᑕ ᐃᓐᓇᐃᑦ

ᓄᑕᕋᐅᖏᑦᑐᑦ, ᐃᓐᓇᐃᑦ ᓄᑕᕋᖃᖅᑐᑦ. ᑖᓐᓇ ᐊᑐᖅᑕᐅᓗᐊᖅᐸᓚᐅᖅᑐᖅ

ᐊᕙᓪᓗᖅ. ᐃᒪᓐᓇᐃᑦᑐᐃᓐᓇᕐᒥᒡᓗ ᐊᒻᒪ ᐱᖃᕈᓐᓇᓚᐅᖅᖢᓂ [ᑎᐴᕋ ᑎᑯᑎᑦᑎᔪᖅ ᑐᑭᓕᐊᖅᑐᒥᒃ ᑲᒥᖕᒦᑦᑐᒥᒃ, ᐃᒃᐱᐊᕐᔪᖃᖖᒋᑦᑐᖅ],

ᐅᓇ ᖃᕐᓕᒃ. ᖃᕐᓕᒋᓪᓗᒍ ᑕᑉᐸᐅᖓ [ᑎᐴᕋ ᑎᒃᑯᐊᖅᑐᖅ ᓯᕝᕕᐊᖕᒐᓄᑦ] ᖃᕐᓕᖕᒧᑦ ᐊᒃᑐᖏᖅᓯᒪᑦᑎᐊᖅᖢᒍ

ᐅᕘᓇ ᑖᓐᓇ ᐃᓚᑰᕌᕐᔪᖕᒪᑦ [ᑎᐴᕋ ᑎᒃᑯᐊᖅᓯᔪᖅ ᑲᒥᐅᑉ ᖄᖕᒐᓄᑦ]. ᐃᐱᐅᑕᖃᙱᒻᒪᑦ ᐊᑦᑐᖏᕐᕕᖓᓂᒃ ᐅᓇ

ᐱᑕᖃᖏᑦᑐᖅ. ᐊᒃᑐᖏᕐᕕᖓᓂᒃ ᐸᐅᖓ ᐱᑕᖃᕆᐊᖃᖅᑑᒐᓗᐊᖅ.

ᑖᓐᓇ ᐊᕙᓪᓗᖅ ᐳᐊᓗᒃᑯᕕᕕᓂᖅ ᑕᐃᔅᓱᒪᓂ. ᒫᓐᓇᓕ ᐊᑐᔮᕈᓐᓃᖅᑐᖅ

ᒫᓐᓇᒃᑯᓪᓕ ᐊᑐᖅᑕᐅᕙᔮᕈᓐᓃᖅᑐᖅ ᑖᓐᓇ. ᑕᐃᔅᓱᒪᓂ ᑭᓯᐊᓂ

ᓯᕗᓕᑦᑎᓐᓂᑦ ᓯᕗᓕᒻᒪᕆᐊᓗᑦᑎᓐᓂᑦ ᐊᑐᒐᓪᓗᐊᑕᐅᓚᐅᖅᓯᒪᔪᖅ.

ᐊᓪᓛᖃᑦᑕᒥ ᓄᑕᕋᖃᖅᑐᒥᒃ ᐊᕐᓇᖅᓯᐅᑕᐅᖕᒪᑦ. ᐊᐅᓪᓛᖃᑦᑕᒥ

ᐊᒪᖃᖅᑐᒥᒃ ᖃᕐᓕᒋᔭᐅᕙᓚᐅᖅᑐᑦ ᐅᑭᐅᒃᑯᑦ ᐊᑐᖅᑕᐅᕙᓚᐅᖅᑐᖅ.

ᑖᓐᓇ ᐅᖃᐅᓯᕆᔪᒪᓗᐊᖦᖤᖅᐸᕋ. ᖃᓄᐃᒻᒪᑦ ᐅᓇ ᑕᐃᒪᓐᓇᐃᕌᓗᒃᐸ?

ᐅᓇ ᐳᐊᓗᒃᑯᕕᒃ. ᓄᑕᕋᑯᓗᖕᒥᒃ ᖁᒥᖕᓂᐊᖅᑕᒥᓂᒃ ᖁᓕᑦᑖᖅᖢᓂ

ᐊᑎᒋᓯᒪᓗᓂᓘᓐᓃᑦ ᓄᑕᕋᑯᓗᖕᒥᒃ ᖁᒥᖕᓂᐊᓕᕋᒥ ᐳᐊᓘᖕᓂ

ᑕᒡᕗᙵᖅᖢᓂᒋᒃ ᖁᒦᒃᖢᓂ. ᐳᐊᓗᒃᑯᕕᒃ, ᐃᒃᐱᐊᕐᔪᒋᔭᕙᓚᐅᖅᑐᖅ

ᑖᓐᓇ, ᐅᕙᖓ ᑖᓐᓇ ᐊᑐᓚᐅᖅᓯᒪᙱᑕᕋ ᓄᑖᓗᐊᕈᓘᒐᒪᓕ [ᐃᒡᓚᕐ>ᖅ]

ᑖᓐᓇ ᐊᑐᓚᐅᙱᑕᕋ. ᑭᓯᐊᓂᓕ ᐊᒪᐅᑎᑕᖃ... ᐊᕐᓇᖅᓯᐅᑎᒥᒃ

ᐊᒪᐅᑎᑕᖃᕆᐊᖃᖅᑑᒐᓗᐊᖅ ᓲᕐᓗ ᑖᓐᓇ. ᖁᔭᓐᓇᒦᒃ ᑕᒪᒃᑯᓂᖓ

ᖃᐅᔨᑎᑕᐅᕚᓪᓕᖅᓯᒪᓕᕋᑦᑕ. ᑕᒪᒃᑯᐊ ᐊᒦᑦ ᑕᐃᔅᓱᒪᓂ ᐅᖅᑰᓂᖅᐹᖑᓚᐅᕐᒪᑕ

ᐊᓐᓄᕌᕆᓪᓗᒋᑦ. ᕿᑐᒻᒪᒃᓴᕆᐊᖃᖃᑦᑕᓚᐅᖅᓯᒪᖦᖤᖅᐳᑦ.

ᑕᒪᒃᑯᐊ ᐅᖅᑰᓂᖅᐹᕌᓘᓚᐅᕐᒪᑕ ᑕᐃᔅᓱᒪᓂ. ᐊᓐᓄᕌᓪᓗᐊᑕᐅᓚᐅᖅᑐᑦ

ᐅᐱᕐᖔᒃᑯᑦ ᓴᒡᒐᓛᑯᓗᖕᓂᒃ ᖃᓕᕌᖃᖅᐸᙱᑦᑐᐊᓘᒐᒥᒃ

ᓴᒡᒐᓛᑯᓗᖕᓂᒃ ᖄᖓᒍᑦ ᐊᓐᓄᕌᒥᒃ ᐊᓐᓄᕌᖃᖅᐸᓚᐅᖅᑐᑦ

ᖃᓕᕈᐊᖅ. ᖃᓕᕈᐊᕐᒥᒃ ᑕᐃᔭᐅᓪᓗᑎᒃ. ᐊᓈᓇᒐ ᑕᐃᒪᐃᑦᑐᖃᖅᐸᓚᐅᖅᑐᕕᓂᖅ.

ᓴᒡᒐᓛᑯᓗᖕᓂᒃ ᐅᐱᕐᖔᒃᑯᑦ ᐅᑭᐅᖅᓯᐅᑎᐅᙱᑦᑐᓂᒃ ᐅᐱᕐᖔᒃᑯᑦ

ᓴᒡᒐᓛᑯᓗᖕᓂᒃ ᑕᐃᒪᓐᓇ ᓵᑎᒋᔪᓂᒃ ᐊᓐᓄᕌᖃᖅᑎᑕᐅᕙᓚᐅᖅᑐᐃᑦ.

ᐱᐅᔪᐊᓗᐃᑦ, ᐅᕿᖦᖢᑎᒡᓗ ᓱᕕᖏᖦᖢᑎᒡᓗ ᐅᖅᑰᓪᓗᑎᒡᓗ.

ᒫᓐᓇᓕ ᑕᐃᒃᑯᐊ ᐱᑕᖃᖅᑎᑕᐅᔮᕈᓐᓃᖅᑐᑦ ᐊᑐᖅᑎᑕᐅᔮᕈᓐᓃᖅᑐᐃᑦ.