ᓯᓚᐹᖅ ᓄᑕᕋᖅᓯᐅᑦ

ᓄᑕᖅᑲᓄᑦ ᖃᕐᓖᒃ, ᑐᒃᑑᑉ ᐊᒥᖏᓐᓂᑦ ᓴᓇᓯᒪᔫᒃ, ᐊᕐᓇᓄᑦ ᐊᖑᑎᓄᓪᓗ ᐊᑐᖅᑕᐅᕙᒃᑐᑐᑦ ᓴᓇᓯᒪᑲᓴᑦᑎᐊᖅᑑᒃ. ᑐᑭᒧᑦ ᖃᑯᖅᑐᓖᑦ ᐊᑐᖅᑕᐅᕙᓚᐅᖅᑐᑦ ᐊᕐᓇᓄᑦ, ᕿᕐᓂᖅᑐᖃᖅᑐᑦ ᖃᑯᖅᑐᖏᑦ ᐊᖑᑎᓄᑦ ᐊᑐᖅᑕᐅᕙᒃᖢᑎᒃ.

ᐅᖃᖅᑕᐅᓯᒪᔪᓂᑦ, ᑲᒦᒃ ᖃᕐᓖᖕᓄᑦ ᒥᖅᓱᖅᑕᐅᓯᒪᕙᓚᐅᙱᑦᑐᑦ, ᓄᑕᖅᑲᑦ ᓇᖕᒥᓂᖅ ᐊᓐᓄᕌᕈᓐᓇᖅᓯᓯᒪᕙᓚᐅᕐᒪᑕ. ᐊᒻᒪ, ᓂᕕᐊᖅᓵᑉ ᑲᒥᖏᒃ ᖃᕐᓕᖏᖕᓄᑦ ᒥᖅᓱᖅᑕᐅᓯᒪᓂᕋᖅᑕᐅᓯᒪᔫᒃ ᖃᖓᑐᖃᐅᓂᖅᓴᒥᙶᖅᖢᓂ. ᑭᖑᓂᐊᒍᑦ ᑭᓯᐊᓂ, ᐃᒡᓗᓕᖕᒥᐅᑦ ᓄᓇᓕᖕᓄᑦ ᑲᑎᓯᒪᓕᕋᒥᒃ ᑕᖅᓴᕆᒃᑐᓂᒃ ᒥᖅᓱᒐᒃᓴᖃᖃᑦᑕᓕᓚᐅᖅᓯᒪᔪᑦ.

ᒫᓐᓇ ᓄᑕᖅᑲᑦ ᐊᓃᕋᔭᒃᐸᓕᖅᑐᑦ ᖃᓪᓗᓈᖅᑕᔭᓂᒃ ᐊᓐᓄᕌᖃᖅᖢᑎᒃ. ᑭᓯᐊᓂ ᓱᓕ ᑕᒪᒃᑯᐊ ᐊᒦᑦ ᖃᕐᓖᑦ ᓴᓇᔭᐅᕙᒃᑑᒐᓗᐊᑦ ᓴᓇᔭᐅᒐᔪᙱᓐᓂᖅᓴᐅᓕᖅᑐᑦ. ᐊᑐᖅᑕᐅᕙᒃᑐᑦ ᐊᖑᓇᓱᒋᐊᖅᓯᒪᔪᓄᑦ ᐅᓪᓗᒐᓴᓄᑦ.