ᐊᖓᒃᑰᑉ ᐊᑎᒋᖓ
ᐅᓇ ᕿᖓᐃᓕᓴᐅᑉ ᐊᑐᓚᐅᖅᑕᕕᓂᖓᑐᑦ ᓴᓇᓯᒪᔪᖅ, ᐃᒡᓗᓕᖕᒥ ᐊᖓᒃᑰᓚᐅᖅᑐᕕᓂᖅ. ᐊᒥᓱᑦ ᐅᖃᖅᓯᒪᔪᑦ, ᐊᖑᓇᓱᖕᓂᕐᒥᓂ ᐊᔾᔨᒌᙱᑦᑐᒃᑰᖃᑦᑕᖅᓯᒪᓂᖓᓂᒃ, ᐊᑐᖃᑦᑕᖅᓯᒪᔭᒥᓄᓪᓗ ᐆᒥᖓ ᖁᓕᑦᑕᖃᓕᖅᑐᕕᓂᐅᓪᓗᓂ.
ᐅᓂᒃᑳᖅᑕᐅᓂᖏᑦ ᐊᔾᔨᒌᖃᑦᑕᙱᑦᑐᑦ. ᐃᓚᖏᑦ ᐅᖃᖅᓯᒪᔪᑦ, ᑐᒃᑐᓕᐊᖅᓯᒪᓪᓗᓂ, ᕿᖓᐃᓕᓴᖅ ᐊᐳᖃᑎᖃᓚᐅᖅᓯᒪᔪᕕᓂᖅ ᐊᖑᒻᒥᒃ ᐸᓴᒍᓱᒃᑐᒥᒃ ᐃᕐᓂᖓᓂᒃ ᑐᖂᑦᑎᔪᕕᓂᐅᔭᕆᐊᒃᓴᖓᓂᒃ. ᑕᐃᒪᐃᓚᐅᖅᑎᓪᓗᒋᒃ, ᑐᒃᑐᑉ ᑕᕐᓂᖓᓄᑦ ᑖᔅᓱᒥᖓ ᖁᓕᑦᑕᓕᐅᖁᔭᐅᓕᕐᓂᖅᖢᓂ. ᐊᓯᖏᑦ ᐅᖃᖅᓯᒪᔪᑦ ᕿᖓᐃᓕᓴᖅ ᖃᖅᑲᕐᒧᑦ ᒪᔪᖅᑐᕕᓂᐅᓂᕋᖅᑕᐅᓪᓗᓂ ᑑᕐᖓᕐᓗᖕᒧᑦ ᖄᖓᓐᓂᑦ ᐊᔭᒡᓗᓂᐅᒃ ᑐᖁᑕᐅᒋᐊᕐᓂᖅᖢᓂ. ᐊᓐᓇᒃᑎᑕᐅᓚᐅᖅᓯᒪᔪᖅ “ᐊᐃᖏᓕᒧᑦ” ᑖᕐᖓᕐᒧᓪᓘᓐᓃᑦ ᑖᔅᓱᒥᖓ ᖁᓕᑦᑕᓕᐅᖁᔭᐅᓕᖅᖢᓂ.
ᐊᒡᒐᙳᐊᑦ ᓴᒡᕕᖓᓂ ᓇᓗᓇᐃᖅᓯᔪᒃ ᐊᔭᒃᑕᐅᒋᐊᓚᐅᖅᓯᒪᓂᖓᓂᒃ. ᐱᖓᓱᓂᒃ ᓇᓗᓇᐃᖅᓯᓯᒪᓪᓗᓂ: ᑑᕐᖓᖅ ᐊᓐᓇᒃᑎᑦᑎᓚᐅᖅᑐᖅ, ᑑᕐᖓᖅ ᐃᑲᔪᖅᑎᖓ, ᑑᕐᖓᕐᓗᒡᓘᓐᓃᑦ.
1980-ᖏᓐᓂ, ᐱᕐᓈ ᐱᖓᓱᓂᒃ ᐊᔾᔨᖏᓐᓂᒃ ᓴᓇᔭᐅᑎᑦᑎᓚᐅᖅᓯᒪᔪᖅ ᔩᓂ ᐊᕐᓇᐃᓐᓄᖕᒧᑦ ᐃᓚᖏᓐᓄᓪᓗ, ᕿᖓᐃᓕᓴᐅᑉ ᕿᖑᕚᖏᓐᓄᑦ. ᐱᖓᓱᑦ ᓴᓇᔭᐅᑎᓚᐅᖅᑕᖏᑦ ᓚᕚᓪ ᓯᓚᑦᑐᖅᓴᕐᕕᒡᔪᐊᖓᓃᓕᖅᑐᑦ, ᑲᓇᑕᐅᑉ ᑕᑯᔭᒐᖃᕐᕕᖓᓂ, ᐊᒻᒪ ᔭᓗᓇᐃᒥ ᑕᑯᔭᒐᖃᕐᕕᖕᒥ.
