ᐱᓯᒃᓯ
ᐱᓯᒃᓯᑦ ᐴᖃᖅᖢᓂ ᖃᕐᔪᓄᑦ, ᐱᓯᒃᓯᖓᓄᑦ, ᑕᓪᓕᒪᐅᓪᓗᑎᒃ ᖃᕐᔪᑦ, ᐱᓯᒃᓯᒡᓗ. ᐊᖑᓇᓲᑕᐅᕙᓚᐅᖅᑐᖅ ᓄᓇᒥᐅᑕᐅᓄᑦ, ᓲᕐᓗ ᓇᓄᕐᓄᑦ, ᐊᒻᒪ ᐊᖑᓇᓲᑕᐅᔪᓐᓇᖅᖢᓂ ᒥᑭᓐᓂᖅᓴᓄᑦ ᑎᕐᒥᐊᓄᑦ.
ᐱᓯᒃᓯ
ᐱᓯᒃᓯ ᐱᖓᓱᓂᑦ ᓇᒡᔪᓂᑦ ᓴᓇᓯᒪᓪᓗᓂ ᑭᑭᐊᒃᑕᐅᓯᒪᓪᓗᑎᒃ. ᐃᒡᓗᓕᖕᒥᐅᑦ ᑭᑭᐊᖃᓚᐅᖅᑎᓐᓇᒋᑦ, ᐊᐃᕕᑦ ᐆᒫᖏᓐᓂᒃ ᐃᕙᓗᓂᒡᓘᓐᓃᑦ ᐊᑦᑕᑎᖃᖅᐸᓚᐅᖅᑐᑦ. ᑎᒍᒥᐊᕐᕕᖓᓂ, ᐃᕙᓗᓄᑦ ᐱᕐᕋᖅᓯᒪᔪᓄᑦ ᐊᑦᑕᓇᐃᕆᐊᖅᓯᒪᓪᓗᑎᒃ. ᐃᒡᓗᖔᖓᓂ, ᓄᖅᑲᕕᖓ, ᐃᓱᖏᖕᓄᑦ ᐊᑕᓪᓗᓂ. ᖃᕐᔪᖕᓂᒃ ᐱᓯᒃᓯᔪᓐᓇᖅᖢᑎᒃ.
ᖃᕐᔪᑦ
ᑖᒃᑯᐊ, ᖃᕐᔪᐃᑦ ᕿᔪᖕᒥᒃ ᓴᓇᓯᒪᔪᑦ, ᑕᐃᔅᓱᒪᓂ ᓴᐅᓂᕐᓂᒃ ᓇᒡᔪᓂᒡᓘᓐᓃᑦ ᓴᓇᓯᒪᕙᓚᐅᖅᓯᒪᔪᑦ ᕿᔪᖃᓗᐊᖅᐸᓚᐅᖅᓯᒪᙱᒻᒪᑦ ᐃᒡᓗᓕᒃᐸᓯᖕᒥ. ᓇᖅᑯᖓ ᓇᒡᔪᖕᒥᑦ ᓴᕕᕋᔭᖕᒥᓪᓘᓐᓃᑦ ᓴᓇᓯᒪᓪᓗᓂ ᐃᐱᒃᓴᖅᓯᒪᑐᐃᓐᓇᖅᖢᓂ. ᐃᑭᓕᖅᓯᔪᓐᓇᕆᐊᖅᖢᓂ ᐆᒪᔪᕐᒥᒃ. ᓇᖅᑯᖓ ᐋᖅᑭᒃᓯᒪᓪᓗᓂ ᐳᓚᕙᓪᓕᐊᑐᐃᓐᓇᕐᓂᐊᖅᖢᓂ ᓂᕐᔪᑎ ᐊᐅᓚᓂᖓᓄᑦ. ᓱᓗᒡᕙᐅᑎᑦ ᑐᕌᖅᑎᑦᑎᐊᕈᓐᓇᕈᑕᐅᓪᓗᑎᒃ.
ᖃᕐᔫᑉ ᐴᖓ
ᖃᕐᔪᐃᑦ ᐊᒥᕐᒧᑦ ᓴᓇᓯᒪᔪᓂᒃ ᐴᖃᖅᐸᓚᐅᖅᑐᑦ, ᐅᓇ ᐱᐅᒑᑦᑐᖕᒥᒃ ᑎᑎᕋᕐᕕᒋᓯᒪᔪᖅ - ᐱᖃᖅᑎᐅᓚᐅᖅᑑᑉ ᐊᑎᖓ: ᓄᐊ ᐱᐅᒑᑦᑐᒃ ᖃᕐᔫᑉ ᐴᖓ ᐊᑕᓪᓗᓂ ᐱᓯᒃᓯᐅᑉ ᐴᖓᓄᑦ, ᕿᓯᖕᒥᑦ ᓴᓇᓯᒪᔪᖅ. ᐴᖓ ᐱᓯᖕᓯᖕᒥᑦ ᓇᐃᓐᓂᖅᓴᐅᕌᕐᔪᒃᖢᓂ, ᐊᖑᓇᓱᒃᑎᒧᑦ ᐱᓯᒃᓯ ᐊᒧᔭᐅᑲᐅᖅᑐᕈᓐᓇᕐᓂᖅᓴᐅᓂᐊᕐᒪᑦ.
ᒫᓐᓇ, ᐊᖑᓇᓱᒃᑎᑦ ᖁᑭᐅᑎᓂᒃ ᐊᑐᕈᒪᓂᖅᓴᐅᓕᖅᑐᑦ, ᐅᖓᓯᒃᑐᒦᑦᑐᓂᒃ ᖁᑭᖅᓯᔪᓐᓇᕐᓂᖏᓐᓄᑦ. ᖁᑭᐅᑎᑖᕆᐊᒃᓴᖅ ᓱᓇᒐᖅᑖᕆᐊᒃᓴᕐᓗ ᐱᒡᒐᓇᙱᓐᓂᖅᓴᐅᓪᓗᓂ ᐱᓯᒃᓯᓕᐅᕋᓱᖕᓂᕐᒥᒃ ᖃᕐᔪᓕᐅᕋᓱᖕᓂᕐᒥᒡᓗ ᓄᓇᒥᙶᖅᓯᒪᔪᓂᒃ.
