ᐊᖑᓇᓲᑎᑦ ᐳᐃᔨᓂᒃ
ᑖᒃᑯᐊ ᐊᖏᔪᓂᒃ ᐊᖑᓇᓲᑕᐅᕙᓚᐅᖅᑐᑦ ᓲᕐᓗ ᕿᓚᓗᒐᕐᓂᒃ, ᐊᓪᓚᙳᐊᓂᒃ, ᐊᕐᕕᖕᓂᒡᓗ. ᐊᐅᔭᒃᑯᑦ ᐊᑐᖅᑕᐅᕙᓚᐅᖅᓯᒪᔪᖅ ᖃᔭᒃᑯᑦ, ᐊᐅᓚᐅᑎᓕᖕᓂᒃ ᐅᒥᐊᖃᓕᓚᐅᖅᑎᓐᓇᒋᑦ.
ᑑᒃᑲᑦ
ᑑᒃᑳᒃ ᐅᓈᕐᒧᑦ ᐋᖅᑭᒃᑕᐅᓪᓗᑎᒃ ᓇᐅᓕᒃᓯᔾᔪᑕᐅᕙᓚᐅᖅᑐᑦ ᐆᒪᔪᓂᒃ. ᑑᒃᑲᖅ ᐊᑕᓪᓗᓂ ᐊᓕᕐᒧᑦ, ᑖᓐᓇ ᐊᑕᓪᓗᓂ ᖃᖏᐊᓄᑦ ᐊᕙᑕᖃᖅᑐᒧᑦ. ᐊᕙᑕᕐᒧᑦ ᐊᖑᓇᓱᒃᑎᑦ ᖃᐅᔨᒪᔪᓐᓇᓚᐅᖅᐳᑦ ᐆᒪᔪᖅ ᓇᓃᒻᒪᖔᑦ, ᐆᒪᔪᕐᓗ ᑭᕕᔾᔭᐃᖅᑕᐅᓪᓗᓂ. ᑐᑭᓯᓇᖅᓯᓪᓗᓂ ᓲᖅ ᓇᑦᑎᑦ ᑕᓕᕈᖏᒃ ᐲᖅᑕᐅᓯᒪᙱᒻᒪᖔᑎᒃ, ᐊᒻᒪ ᓲᖅ ᐊᖕᒪᖅᑕᐅᑦᑕᐃᓕᑦᑎᐊᕆᐊᖃᕐᓂᖓ. ᐊᑑᑎᖃᒻᒪᕆᓚᐅᕐᒪᑕ ᐊᕙᑕᓕᐊᖑᔪᓄᑦ, ᑐᒍᓯᔭᒃᓴᓂᕐᒥᑐᐃᓐᓇᐅᙱᑦᑐᖅ ᐊᕙᑕᕐᓂᒃ, ᓄᑭᖃᐅᕋᒥᒃ, ᐳᒃᑕᔪᓐᓇᕈᑕᐅᓂᖅᓴᐅᓚᐅᖅᑐᑦ. ᐊᖏᔪᑦ ᐳᐃᔨᑦ ᕿᓯᖏᑦ ᓵᓐᓂᖏᓐᓄᑦ, ᑑᒃᑲᖅ ᐃᐱᒃᑐᓕᐊᕆᓯᒪᓚᐅᙱᑦᑐᖅ ᓇᐅᓕᒃᓯᒍᓂ ᐊᑕᔪᓐᓇᕐᓂᐊᕐᒪᑦ. ᐊᓕᖓ ᐊᑕᓪᓗᓂ ᑑᒑᕐᒧᑦ ᓴᓇᓯᒪᔪᒧᑦ.
ᓂᐅᑕᑦ
ᒪᕐᕉᒃ ᕿᓚᐅᑎᐅᔮᖅᑑᒃ ᑲᑦᑐᖅᓯᔾᔪᑎᒃ ᓂᐅᑕᕐᒥᒃ ᑕᐃᔭᐅᔫᒃ ᓇᐅᓕᒃᑕᐅᓯᒪᔪᓂᒃ ᑲᑦᑐᖅᓯᑎᑦᑎᔾᔪᑏᒃ. ᑕᐃᒪᐃᑦᑐᓕᐅᖅᐸᓚᐅᖅᓯᒪᔪᑦ ᓴᐅᓂᕐᓄᑦ ᕿᓯᖕᓂᒃ ᐊᕙᓯᓪᓗᑎᒃ. ᐊᖕᒪᔪᖅ ᕿᑎᐊᓃᑦᑐᖅ ᐃᒪᐃᖅᐸᓪᓕᐊᔾᔪᑕᐅᓪᓗᓂ ᓱᑲᓗᐊᕐᓂᐊᙱᒻᒪᑦ, ᓱᕋᖕᓂᐊᙱᒻᒪᑦ. ᐃᒪᕐᒥ ᐅᓂᐊᖅᑕᐅᓂᖓᒍᑦ ᐊᖑᓇᓱᒃᑎᑦ ᖃᐅᔨᔪᓐᓇᖅᐸᓚᐅᖅᐳᑦ ᐆᒪᔪᖅ ᓇᓃᓐᓂᖓᓂᒃ. ᐆᒪᔫᑉ ᐊᖏᓂᖓ ᒪᓕᒡᓗᒍ ᓂᐅᑕᑦ ᐊᖏᓕᕇᒃᐸᓚᐅᕐᒥᔪᑦ. ᐊᖏᓂᖅᓴᖅ ᐊᑐᖅᑕᐅᕙᓚᐅᖅᑐᖅ ᐊᕐᕕᖕᓄᑦ. ᐃᓄᑐᖃᐃᑦ ᐊᖏᖃᑎᒌᒍᓐᓇᓚᐅᙱᑦᑐᑦ ᖃᓄᖅ ᓂᐅᑕᑦ ᐊᑕᑎᑕᐅᕙᓚᐅᕐᒪᖔᑕ ᑑᒃᑲᕐᒧᑦ.
ᒫᓐᓇ, ᑑᒃᑲᑦ ᓴᕕᕋᔭᖕᓂᑦ ᓴᓇᓯᒪᕙᓕᖅᑐᑦ, ᓴᐅᓂᕐᓂᐅᙱᑦᑐᖅ ᓇᒡᔪᖕᓂᐅᙱᑦᑐᖅ. ᐊᕙᑕᑦ ᑭᖑᕝᕕᖅᑕᐅᓯᒪᓕᖅᑐᖅ ᐊᐅᒃᑕᔫᓄᑦ ᐊᕙᑕᑲᓪᓚᓄᑦ, ᐊᖑᓇᓱᒃᑎᑦ ᐅᖃᖅᐸᑦᑑᒐᓗᐊᑦ ᐊᕙᑕᑐᖃᑦ ᐊᑑᑎᖃᑦᑎᐊᕐᓂᖅᓴᐅᓂᖏᓐᓂᒃ. ᑕᒪᒃᑯᐊ ᐊᑐᖅᑕᐅᓗᐊᖅᐸᒍᓐᓃᖅᑐᑦ. ᐊᒻᒪ ᕿᓯᖕᓂᑦ ᓴᓇᓯᒪᔪᓐᓃᖅᖢᑎᒃ, ᕿᔪᖕᓂᒃ ᕿᑎᐊᒍᑦ ᐊᖕᒪᔪᓕᖕᓂᒃ ᓴᓇᓯᒪᕙᓕᖅᑐᑦ.
